Ezekiel’ gen Gog leh Magog

Tutung Iran in Israel akap ciang, mi tampi takin “Ezekiel’ thugen a tangtung ding hita in ciai” kici aa, Israelte in Iran thukkik ding khensat khin kici leuleu ahih manin bang thu tengin hong zom to ding cih lunglut huai tham khat suak hi. Tu aa Israel gam buaina tawh kisai a tomin himun leh himunte ah ih gelh khin hi. Ezekiel’ thugen a tangtung hi, a kicih theihna pen Ezekiel 38-39 sung a kisiksan hi-in, tua sungah Ezekiel in a bulpi-in a gen thu pen Gog leh Magog thu ahi hi. Mi tampi takin, tua Ezekiel thugen kikan khinin, ngaihsut zia leh muh zia tuamtuam om hi.

𝐆𝐨𝐠 𝐥𝐞𝐡 𝐌𝐚𝐠𝐨𝐠

Gog leh Magog pen Lai Siangtho (LST) Ezekiel sung thamloh Mangmuhna sungah zong omin, mi pawlkhat in a gennop a kibang dingin gen uh aa, pawlkhatin a kibanglo dingin gen uh hi. Keima mimal in ahih leh a kicingin ka kan zawh nailoh hangin, a kibanglo dingin ka um zaw hi.

Ezekiel’ gen Gog leh Magog tawh kisai-in, 1 Khang 5 sungah Gog cih min nei khat omin amah pen kamsang Joel tu, Shemaiah tapa hi aa, Joel leuleu pen Jacob tapa Reuben’ suan ahi hi. Tua Gog ii suan le khakte LST sungah a kicianin omlo ahih manin, Gog leh Magog thu a kante in zong, Gog tawh kisai thu tam gen nawnlo uh hi. Ahang a dang khat a om thei ding khat ah, Ezekiel genna-ah Magog pen Gog in uk ding ahih manin, Magog kikan thei peuh leh Gog kankul tangtang nawnlo ci-in a kingaihsun zong hikha mai thei hi. Thamlo in, Ezekiel gen Gog pen min seel dingkhawng zong hi thei ding hi.

Bangbang ahi zongin, Tibet tangthu tawh kisai sungah Gog tawh kizawi tawn tangthu khat om citciat hi. Tua pen, Tibet gam sungah Guge khua-a kici khat om ngei hi, ci-in kigelh aa, mi pawlkhatte in Gog pan apai ahitam, ci uh hi. DNA bulphuhin a kikan ciangin tua khua tawh a kizom diak mite pen Asia nitumna lam kuam ah a tengte hi phadeuh hi, kici hi.

Magog leuelu pen LST mah siksanin kikan ciat leuleu hi. Piancil 10:2 sungah Magog cih kimu in, amah pen Noah tupa hi aa, tuiciin tun khit ciang Noah tapa Japheth in aneih ahi hi. Tanglai, ama hun lai-in Catholic Bishop te lak ah alian pen Johannes Magnus in Magog thu na gelh ngei-in, Magog pen tuiciin tun khit kum 88 ciangin Scandinavia-ah tai-in ta 5 nei hi ci hi. Tua Scandinaviaa kici mun pen Europe gam sung, a diakin Norway, Sweden, leh Denmark kuam teng ahi hi.

Jew mi tangthu thei Josephus leuleu in, Gog leh Magog tawh kisai agelhna-ah, Gog pen kua suan hi-in, ama suante koi ah om cih gelh lo in, Magog thu gelh aa, Meshech leh Tubal te tawh kizom sakin, Japheth suan hi ci-in (Pian 10:2, 1 Khang 1:5 te tawh zong kituak), Thobelites ahih keileh Iberia (Black sea) a kicina munte ah a teengte hi, ci hi. Tua mun aa mite pen hun khat ciang Georgia-a kici Asia nitumna lam leh Europe nisuahna lam ah tenguh aa, Europe lam ate pen Tubal ahih keileh Tbilisi ci-in zong a kithei na mun ah a tengte hi uh aa, tua panin pawlkhatte pen Tobol kici-in, tua min siksanin tua mite tam ateen penpenna khua zong Tobolsk kici hi, ci-in kigelh hi. Tua Tobolsk pen tu laitak Russia gam sungah om hi. Tua Josephus ciaptehna siksanin Meshech pen tulai tak aa Turkey kuam teng hi dingin International Dictionary of Historic Places: Southern Europe sungah kigelh leuleu hi.

Tua hi-in, hih tangthu kiciamtehte leh Ezekiel’ thugen, Magog a kici gam sungah Meshech leh Tubal khuapi nih omin, tuate pen Gog a kici mi khat in uk-in, hun khat ciang amah leh a kibelpawlpih gamte in Israelte do ding cih thu pen (Ezekiel 38:2-6), a kipanpan ta hi, aci tampi tak omin pawlkhat bangin Russia kumpipa Vladimir Putin bang pen Gog hi, ciliang uh hi. Ahang pen Iran, Syria, Turkey, Palestinian, leh Russia, cihte kipawl ding ahih keileh a kipawlpawl khin uh cih theih ding zong suak veve hi.

Hi lai ah, ka lunglut citciat thu: 1 Khang sunga’ Gog pen Israelte’ khangsimna Jacob suan ahih huhau in Israelte a do kik dingin hi theilo hi, cih ngaihsutna tawh ama khanggui Magog tawh kizomin a kikanlo ahi tam? Ahih keileh, Ezekiel gen Gog cih min pen Magog a uk ding min seel ahih manin, kan kul nawnlo in Magog suante sungah a kihel hipah hi, ci-in a kingaihsutna hang
ahizaw tam? Ahih keileh a tunga Magog tawh kisai thute zong, tangtawng aa muhzia leh ngaihsut zia a kibanglo gam tuamtuam a omte tungtawnin a kideih kaih kawmkawm peuh ahitam?

𝐀𝐡𝐮𝐧

Tua Gog leh Magog in Israel a do hun ding pen, Israelte a gam uh ah akikaihkhop khit hun (Ezekiel 38:7-9). Hih hun pen Israel gam a kikipsak hun, 1948 kum panin a kicingcing hita hi cih theih ding khat suak ding.

Israelte amau leh amau kimuangin lungmuangin a om laitak uh (Ezekiel 38:14-16). Tuma kum 20 khawng pan kipanin manlang takin a khangto Israelte tu laitak a dinmun uh leh Ezekiel gen kituak mawhlo cih theih ding khat suak leuleu.

Israel ah ziin ling ding, leitang kicim gawp ding (Ezekiel 38:19). A nungthu ih et ciang, Si Tuipi huhau in kum 130 pan 150 kikaal simin Israel ah ahatna 6.5 ML zin ling zel ahihna kimu aa, anunung penpen pen 1927 ahi hi. Tua ahih manin, ei’ khang sung, tu zawh kum sawm bangzah hiam sungin Israel ah khatvei zin a liin hun a tung kik leuleu ding cihna suak. Tua ih deih kaih diam aw.

Gog ukna gamte ah khat le khat namsau tawh kithahna om ding, pulnatna om ding guahpi, gialpi, meikuang le kaat kuang, te zu ding (Ezekiel 38:21-22). Hite sung pan pawlkhat piang khin hi kici nuam thei ding.

Tua, Ezekiel gen Gog leh Magog thupiang ding pen gimna lian hun sung hi dingin up huai-in (Ezekiel 39:9), John mangmuhna leuleu pen kum 1000 maanna hunkhit khawng hi thei leh kilawm (Mang 20:7-9). Tua hi-in, Ezekiel gen Gog leh Magog pen sawt nawnlo thei takpi ding tawh kibang.

Bangbang ahi zongin, hi thute a kician sinsenin kuamah in a kigen thei lian ding daanin ka ngaihsun kei aa, ahi zongin hun ngah takin kan man lehang, lunglut huai ka sak bilbel thu khat ahi hi. Ei thu um mite a dingin bel, bangbang apiang zongin tua tawh lungkham ding leh patauh ding bel hilo hi.

Anuai aa laibute leh internet ah akikhah articles tuamtuam tung tawnin a tomin kong gelh hi.

Etkakte

1. Josephus, Flavius. Josephus. Book 1, Chapter VI, Section 1. Kregel Publications, 1960.
2. Johannesson, Kurt. Historia de omnibus Gothorum Sveonumque (English Version).
   Volume 1, Chapter 4-5. Michaelisgillet Publications, 2018.
3. Ring, Trudy, Robert M. Salkin, and Sharon La Boda. International Dictionary of Historic
   Places: Southern Europe. Volume 5. Fitzroy Dearborn Publications, 1994.